وعيت عالدنيا، وكان ناطرني بالبيت ٣ شباب. ومتل كل ولد بحب يقلد اخواته الكبار صرت كل ما تسمحلي الفرصة الزق حالي

فيهن وشوفن شو عم يعملو. كان كل واحد فيهن بارع بشغلة. يعني احمد لي اكبر مني ب ١٠ سنين كان يلعب دور بيي لما اضهر من البيت. مين ما شاف عليي ملاحظة يخبره الو وهوي يجي يحكيني ويحاسبني.

اما علي، لي كتير من الناس بتقلي انو شخصيتك بتشبه شخصيتو، كان هادئ وذكي. كنت قضي وقت معه اكتر من باقي اخواتي فكان عندي فرصة انو اتعلم منه كتير، لدرجة انو صار يتمنى يضهر من البيت ليرتاح مني شوي.

واخيرا منوصل عند زكريا لي كان شريكي بالغرفة واقرب اخواتي لإلي بالعمر. اول شي بيخطر عبالي لما قول زكريا او بالاحرى مش بس على بالي اني، اول شي بيخطر عبال اي حدا لما نحكي عن زكريا كان القوة الجسدية لي عندو ياها واديش كان يقسى علينا هوي وعم يقلنا "اخشوشنوا فإن النعم لا تدوم". كانت هيي كلمة السر لأعرف اني رح آكل قتلة مرتبة بعد كم ثانية اني وراضي. كانت عطول تبلش بضحك ولعب وتنتهي اني وعم ببكي وزعلان منه لانو كناش متفقين انو يقويلي هلقد. كان اقوى مني بكتير. كنت حاول استعمل اي وسيلة بتطلع بإيدي لاضربه فيها بس شو بدو يطلع من واحد متلي معوّد على الكتب والقصص والالعاب الالكترونية قدام زكريا لي خلق وانجبل بالتراب وصار صخرة بشرية بكل ما للكلمة من معنى.

كنت ازعل منه كتير بس بنفس الوقت كل ما شوفه انبسط وروح

اتحركش فيه لحتى نلعب نفس اللعبة لي صرتو تعرفو نهايتها.

بتذكر مرة فتح "سجل التقدم" تبعولي، هيدا متل كتاب صغير كانو يعطونا ياه بالكشاف في بقلبو مجموعات اهداف ثقافية رياضية كشفية لازم نحققها لحتى نقدر ننتقل للمرحلة الاعلى. قلي بدي اعملك اختبار. انا طبعا كيّفت وكنت شايف حالي بين لي حوليي انو مخلص جزء منيح للسجل. وقلتلو جاهز للتحدي. قلي اتفقنا هون بلاقيه طلع عصاية من الجارور، من برائتي لما كنت صغير، فكرتو عم يعمل متل الاستاذ بالصف. انو هيك لازم يحمل عصاية ويلبس عوينات ويبلش يعلمني. هوي كان فعلا استاذ الي، بس من نوع مختلف شوي. فتح هالسجل وبلش يقرأ فيه. فجأة لقيتو ابتسم. قلي يلا رح نبلش بقسم المخيم. من الاهداف لي لازم تحققها انك تعمّر جسر. عمّرت جسر من قبل؟ هوي طبعا عارف انو اني ما عمرت جسر لانو لو عاملها كنت حطيت علامة صح عالدفتر حد هالعبارة. طبعا اني تفاجأت وقلتلو اكيد لا كيف بدي عمر جسر (كان عمري ١١ سنة). فهو استغرب مني وفتح عيونه بتعجب وقلي بعدك مش معمر جسر !

هون كانت اول مرة بعرف شو دور العصاية لي طلعها خيي من الجارور وبظن انتو صرتو تعرفو شو بتعمل لانو رح نجيب سيرتها كتير.

كان هيدا اول درس بيعطيني ياه بشكل جدي انو ممنوع تقول عن شي "ما بقدر اعملوا" وكان زكريا نموذج وقدوة بهالشي.

ما سمعتو بحياتي عم يقول ما فينا او ما منقدر او هاي بتزبطش عنا! كان كل شي يلاقيلو حل، كان دايما يفضل يعمل الاشيا بإيدو على الاشيا لي بتنشرى جاهزة. اديش بيحكو عن المشاكل لي بتصير عند الولد اذا ضربته هوي وصغير، ما بتذكر ولا لحظة انه زكريا سببلي مشكلة. كنت ابكي واضحك هوي وعم يضربني لانو كان دايما يلعب معي ويوصلي الافكار لي بدو ياني اعرفها بطريقة مميزة. وكان دايما يقلي بدك تطلع رجال.

لما كبرت ووعيت وقريت كيف في عنا توصية بالدين عن المصارعة واللعب وانو الشب لازم يخشوشن صرت اشكره لزكريا على كل لحظة قضاها معي واديش صنعلي من شخصيتي بدون ما انتبه..🤍

شهداء عربصاليم

العصف المأكول

فترة ال١٥ شهرا

أولي البأس

الدفاع المقدس

التحرير